სევდიანი შემოდგომის და უფრო სევდიანი ზამთრის შემდეგ, პირობა მაინც შეუსრულეს....

   მე–11 და მე–6 საჯარო სკოლების მესამე კლასელებმა, დღეს საკლასო სპექტაკლი ,,ტყის ბინადრები" ქალბატონ ლენა ხაჟალიას ხსოვნას მიუძღვნეს. შარშანდელი დანაპირები რეალობად აქციეს და საოცრად დახვეწილი, სამსახიობო მანერა სცენაზე გადმოიტანეს.

   პატარებმა მხიარულად მოირგეს ტყის ბინადართა როლები და დიდი მონდომებით შეასრულეს მათზე დაკისრებული ფუნქცია. მელაკუდებმა, კურდღლებმა, დათვებმა, მაიმუნებმა, ოფოფებმა, ყვავებმა და მათმა მეგობრებმა ღრმააზროვნად წარმოაჩინეს დედაბუნების დანიშნულება და ადამიანთა მოვალეობა.

   ,,შარშან ჩვენ ტყის ბინადრების ციკლში წარმოვადგინეთ ,,გაზაფხული ტყეში", წელს კი ,,ზამთარი ტყეში". მაშინ სპექტაკლმა დიდი შთაბეჭილება დატოვა მაყურებელზე და განსაკუთრებით ქალბატონ ლენაზე. ჩვენ მას შევპირდით, რომ წარმოდგენა გაგრძელდებოდა და დღეს ეს დაპირება სისრულეში მოვიყვანეთ", აღნიშნა ჩვენთან საუბარში მე–6 საჯარო სკოლის პედაგოგმა ჟუკიანა ფოფხაძემ. სწორედ ის გახლდათ დღევანდელი სპექტაკლის რეჟისორი.

   განსაკუთრებული მოწიწებით ისაუბრა პატარების მონდომებასა და ნიჭიერებაზე მე–11 საჯარო სკოლის მე–3 კლასის პედაგოგმა, ნაირა ქორიძემ, რომელმაც მცირე რეცენზია გააკეთა და მადლობა გადაუხადა მოსწავლეებს, მათ მშობლებს და სკოლას გვერდით დგომისთვის.

   განსაკუთრებული მადლობა გადაუხადეს სპექტაკლის მომზადებისთვის პედაგოგებს და მოსწავლეებს მე–11 საჯარო სკოლის დირექტორის მოვალეობის შემსრულებელმა ნანა მანჯგალაძემ და მე–6 სკოლის დირექტორმა ლეილა კუბლაშვილმა.