ახალი სასწავლო წლის დაწყებასთან დაკავშირებით სამტრედიელ მოსწავლეებსა და ახალგაზრდებს მუნიციპალიტეტის გამგეობამ საჩუქარი გაუკეთა. ადგილობრივი თვითმმართველობის ორგანიზებით ღია ცის ქვეშ, მომავლის პარკში კონცერტი გაიმართა. მაყურებლის წინაშე ადგილობრივი შემსრულებლები წარსდგნენ. საკონცერტო პროგრამა თოთხმეტი ნომრისაგან შედგებოდა, მათ შორის წარმოდგენილი იყო სამი თანამედროვე ტიპის საცეკვაო და თერთმეტი მუსიკალური ნომერი. კონცერტში სხვადასხვა ასაკის მომღერალი და მევიოლინე მონაწილეობდა. კონცერტს არჩილ ბოხუა უძღვებოდა. საღამო გრანდიოზული ფოიერვერკით დამთავრდა.